Астанада күл төксеңіз айыппұл төлейсіз

Қазақ елінің бас шаһарының тазалығын сақтау тек биліктің ғана міндеті болмаса керек. Қарапайым тұрғындар да қала тазалығын сақтауға үлес қосуы тиіс. Олай болмаған жағдайда қала тәртібін сақтаудың өзге де тәсілдері қарастырылып жатыр.

Кезінде Нью-Йорктың мэрі болған Рудольф Джулиани «сынық терезе теориясына» жүгіне отырып, алып мегаполисті тәртіпке келтіргендігі қазір аңызға бергісіз оқиға ретінде айтылады. Бұл теория бойынша тәртіп бұзудың үлкен-кішісі жоқ. Сол сияқты, қала тазалығында да ұсақ-түйек деген болмаса керек. Сондықтан, Астана әкімшілігі қаланың тазалығын сақтау ісінде тұрғындардың да белсенді болғанын қалайды. Әрі, өздері мекендеп жатқан жердің тазалығын сақтауға мәжбүрлеудің бірқатар тәсілдерін де біледі. Мәселен, Астанада жеке үйлерде тұратындар төңірекке күл төксе 40 мың теңге айыппұл салынады. Әрине, алдымен тиісті мамандар ескерту жасайды, ал тұрғындар ескертуге құлақ аспаса айыппұл төлеуге мәжбүр. Қаладағы бір рет жасалған рейдтің өзінде күлді тиісті орындарға төкпеген 86 дерек анықталып, 700 мың теңгенің айыппұлы салынған.