Теміртау қаласының полицейлері 7 адамды құтқарып қалды

Теміртау қалалық Ішкі істер басқармасына қарасты жол-патрульдік полиция бөлімінің қызметкерлері 7 адамды өлім аузынан алып қалды.

Түңгі кезекшілікке шыққан сержант Сенбеков пен Аманжолов және старшина Әбдірахманов жер үйлердің бірі өртеніп жатқанын байқаған.

Патрульдік топтың екі мүшесі бірден іштегі адамдарды құтқаруға кіріскен. Ал, үшіншісі өрт сөндіру қызметі мен жедел жәрдемге хабар берген.

Өрттен ұшқан шоқ көрші үйдің шатырына түсіп, жел күшімен лезде жалынға оранған. Осылайша тәртіп сақшылары шырт ұйқыда жатқан қос отбасындағы 7 адамды құтқарып үлгеріпті. Олардың арасында 7 және 11 жастағы екі бала болған.

Руслан НҰРЛАНҰЛЫ