Басты Жаңалықтар Бразилияда доп додасы жалғасуда

Бразилияда доп додасы жалғасуда

16.06.2014 08:30

Бразилияда үлкен футбол мерекесі жалғасуда. Әлемнің түкпір-түкпірінен жиналған жанкүйерлер өз командаларына барынша қолдау көрсетуде.

Жанкүйерлердің жиналатын негізгі орны - фанаттар аймағы. Мұнда нағыз футбол тойын сезіне аласың.

Әлемнің әр қиырынан келген футболсүйер қауымның түйіскен тұсы бұл. Бәрінің тілегі бір. Тамаша тартысқа куә болу.

Футбол үшін бірігіп, футбол үшін жаға жыртысуға да бар. Бірақ қауіпсіздік шаралары қатаң сақталған.

Барлығы да қауіпсіздік қызметкерлерінің жіті бақылауында. Фанаттар аймағындағы қалың көрерменнің арасынан жапон жанкүйерлерін кезіктірдік.

Ю мен Айко, Жапония құрамасының жанкүйерлері:

Менің атым - Ю, қасымдағы - Айко. Біз өз құрамамызды қолдау үшін Бразилияға арнайы келдік. Олардан жеңіс күтеміз. Біз осы ойынмен қатар Натал қаласында Грекиямен өтетін матчқа барамыз. Ал, соңғы ойынды үйден тамашалаймыз. Біздің құраманың топтық кезеңінен шығатынына сенеміз. Маған Энданың ойыны ұнайды. Ал, мен Хонданы жақсы көремін.

Бұл нағыз фанат - АҚШ азаматы. Голландияда туып, кейіннен Сан-Францискоға қоныс аударған.

Футбол десе, жанын қиюға дайын. Нағыз фанат. Бразилиядағы Әлем чемпионатына бір жылдай уақыт дайындалған.

Голландия құрамасының айнымас жанкүйері. 1958 жылы шыққан мына көлікті мундиальға арнайы дайындап, мініп келген.

Бірнеше елді басып өтіп, Бразилияға бес айда жетіпті. Ондағы мақсаты – футболда шекара жоқ екенін және нәсілшілдікке жол жоқтығын жанкүйерлерге ұқтыру.

Бен, жанкүйер:

Егер сен футболды жан-тәніңмен сүйсең, Бразилияға келіп, Әлем чемпионатын тамашалаудан артық қандай бақыт бар?! Голландия құрамасына қолдау көрсетуге келдім.

Әлем чемпионатынан кейін Бен еліне жету үшін тағы бес ай бойы жолда жүреді . Жанкешті жанкүйерге біз де алғыс айтып, сәттілік тіледік.

Бөлісу