eGov: Электронды үкіметтің жаңа кезеңі

Биылғы он айда қазақстандықтар 51 миллионнан астам мемлекеттік қызметті онлайн форматта пайдаланған. Оның 32 миллионы eGov Mobile қосымшасына, 18 миллионы eGov.kz порталына тиесілі. Яғни азаматтардың басым көпшілігі смартфон арқылы керегін алған. 2006 жылы іске қосылған eGov.kz порталында бүгінде 15 миллионнан астам қолданушы бар. Мемлекеттік қызметтердің 90 пайызға жуығы интернет арқылы көрсетіледі. Қазір eGov Mobile қосымшасында 1100-ден астам қызмет пен сервис бар. Сондай-ақ жеке куәлік, жүргізуші куәлігі, туу туралы куәлік сияқты 40 цифрлық құжат енгізілген. Биыл eGov 3.0 платформасына көшу басталды. Жаңа жүйе мемлекеттік қызмет көрсетуді одан сайын жеңілдетуі керек.