АҚШ Президентінің арнайы өкілдері Мәскеуге барды

АҚШ президенті Дональд Трамптың арнайы өкілдері мінген ұшақ Мәскеуге қонды. Ресей мен Украина арасында бейбіт келісімнің жасалуына арағайындық танытып  жатқан Стив Уиткофф пен Джаред Кушнер бүгін президент Владимир Путинмен кездеседі. Содан кейін Уиткофф пен Кушнер Дублинге аттанып, Украина президенті Владимир Зеленскиймен жүздеспек. АҚШ президентінің арнайы өкілдері қос елдің президенттерімен жеке кездесуде Әбу-Дабиде өткен үшжақты келіссөз нәтижелерін, тұтқын алмасу мәселелерін талқылайды. Біріккен Араб Әмірліктерінің астанасында екі күн бойы өткен келіссөзде тараптар тұтқын алмасу бойынша ауқымды келісімге келгенін хабарлаған едік.