Қазақстан әлемдегі ірі экономикалар рейтингінде 47-орынға көтеріледі

Қазақстанның жалпы ішкі өнімі 2031 жылға қарай 553,4 миллиард долларға жетуі мүмкін. Бұл - Халықаралық валюта қорының қазан айындағы World Economic Outlook шолуында жарияланған болжам. Құжатқа Президент Қасым-Жомарт Тоқаев та назар аударып, экономика көлемі бойынша Қазақстан әлемде 47-орынға көтерілуі мүмкін екенін атап өтті. Биыл ел экономикасының нақты өсімі 4,4 пайыз шамасында болады деген болжам бар. Ал жан басына шаққандағы номиналды ЖІӨ 19 мың доллардан асып, 2031 жылға қарай 25,5 мың долларға дейін өсуі ықтимал. Сонымен қатар Халықаралық валюта қоры инфляция қарқыны біртіндеп баяулайды деп бағалап отыр. Егер 2026 жылы оның орташа деңгейі 10,3 пайыз болса, 2031 жылға қарай 5 пайызға дейін төмендеуі мүмкін.