Индонезияда вулкан атқылап, 2 мыңдай әуе рейсі доғарылды

Индонезияда отты тау оянып, әуежайларда 2 мыңдай рейс тоқтатылды. 270 мыңдай жолаушы жолдан қалды. Елдің авиациялық порттарында мұндай жағдай екінші күнге ұласып отыр.

Анак-Кракатау жанартауы жұманың кешінде атқылай бастады. Ол шашқан от пен күл 15 шақырым биіктікке көтерілген. Демалыс күндері де басылмаған вулкан тозаңы аспанда анықталғаннан кейін, ел астанасы Джакарта мен өзге үш қалада әуежайларды бүгін де жабуға тура келді. Ал мамандар ауаның тазалығын жарты сағат сайын тексеріп жатыр.

Жергілікті ақпарат құралдарының хабарлауынша, бүгін Индонезияда мектептер де жабылып, теңізде кемелер қатынасы қиындаған.