Президент: Еңбек пен тәртіп – табысқа жетудің көзі

Құрылтайдың алғашқы сессиясын ашқан Мемлекет басшысы еліміздің өсіп-өркендеуіне бөгет болып отырған кедергілерді атады. Жаңа дәуірде құқықтық сауатсыздық, әлеуметтік масылдық, жөнсіз сөз бен орынсыз сынның еш пайдасы жоқ екенін азаматтарымыз білуі қажет деді. Президент бұл бағытта ұлттық сана-сезімді қалыптастыруға ерекше мән беру қажеттігін атап өтті. Мемлекет мақсатшыл, табанды, еңбекқор адамдарға әрдайым жағдай жасайтынын айтты.

Қасым-Жомарт Тоқаев, Қазақстан Республикасының Президенті:

Біз әлеуметтік мемлекет ретінде азаматтардың әлеуетін арттыруға әрдайым баса мән береміз. Білім беру, денсаулық сақтау, мәдениет, спорт және креативті индустрия саласын жан-жақты дамытуға айрықша назар аударамыз. Біз жастарға еңбек пен тәртіптің қаншалықты маңызды екенін түсіндіруіміз керек. Себебі бұл – табысқа жетудің көзі. Азаматтарымыз жаңа дәуірде құқықтық сауатсыздық, әлеуметтік масылдық, жөнсіз сөз бен орынсыз сынның еш пайдасы жоқ екенін білуі қажет. Мұның бәрі – еліміздің өсіп-өркендеуіне бөгет болатын кедергілер. Салиқалы ұлттық сана-сезімді қалыптастыру ісіне айрықша мән беру керек. Мен бұл туралы Тамыз конференциясында арнайы айттым. Енді осы мәселеге Құрылтай қабырғасында қайта оралғанды жөн көріп отырмын.