Басты Жаңалықтар Оралда дропперлікпен айналысқан азамат сотталды

Оралда дропперлікпен айналысқан азамат сотталды

12.08.2026 13:20

Оралда дропперлік жасаған қала тұрғыны сотталды. Ол біреудің банк шоттарын заңсыз пайдаланып, оңай олжа тапқысы келген.

Облыстық экономикалық тергеп-тексеру департаментінің мәліметінше, қала тұрғыны жеңіл ақша табуды көздеп, Telegram-каналдардың бірінен жұмыс тапқан. Міндеті – азын-аулақ ақша үшін банк шоттарын рәсімдейтін адамдарды іздеу. Өз қызметі үшін шотқа түсетін қаражаттың 7%-ын алуға келіскен. Сөйтіп бір әйел адамды тауып, оның жеке деректеріне қол жеткізген.

Сол күні ашылған шотқа интернет-алаяқтардың құрбаны болған жәбірленушіден 500 мың теңге түскен. Ол ақшаның 35 мың теңгесін өзіне алып, қалғанын қылмыстық схеманы ұйымдастырушыға берген. Сот ер адамды кінәлі деп танып, 3 жарым жылға бас бостандығын шектеу жазасын кесті.

Автор

Ардақ Мұратқызы

Бөлісу