Алматыда 7 жарым мың тұрғын жаңа пәтерге көшіріледі

Алматыда тозығы жеткен тұрғын үйлерді жаңарту жұмыстары жалғасып жатыр. 2030 жылға дейін қаладағы жүздеген ескі және сейсмикалық тұрғыдан қауіпті үй кезең-кезеңімен сүріліп, олардың орнына жаңа баспаналар бой көтереді. Бағдарлама аясында шамамен 7 жарым мың тұрғынды жаңа пәтерге көшіру жоспарланған. Қазірдің өзінде 35 жоба қолға алынып, 432 пәтер иесі жаңа баспанаға қоныстанған.

Қалада жаңартуды қажет ететін 1400-ден аса ескі үй бар. Мұнда тұратындар ғимараттардың жылдар бойы жөндеу көрмегенін айтады. Қыста үй жылымай, жауын-шашын кезінде төбеден су өтеді.

Әсел Досаева, қала тұрғыны:

Қыстыгүні жылуды 100 пайызбен толық берсе де, үйлеріміз суық. Өйткені үйлердің бәрі қисайып келе жатыр. Шелдер қатты ашылып жатыр. Шатырдан да,  жерден де.

Тұрғындардың айтуынша, мұндай жағдайда ескі үйді жөндеп қана қою жеткіліксіз. Сондықтан кейбірі жаңа пәтерге көшуге дайын.

Қуан Нұрақын, тілші:

Қабырғасы қақырап, құлаудың аз алдында тұрған үйлердің барлығы алдағы 4 жылда толықтай сүріледі. Жаңартуды қажет ететін үйлердің басым бөлігі Жетісу, Түрксіб, Әуезов және Алмалы аудандарында орналасқан. Бұлардың дені өткен ғасырдың 30-жылдары салынған.

Күләш Досқалиева осы үйде 60 жылдан бері тұрады. Жақында ол құрылыс компаниясымен келісімге келген. Енді жаңа пәтерге қоныс аудармақ.

Күләш Досқалиева, қала тұрғыны:

Мысалы, 60 болса, 75-80-дей площадь береді екен. Бірақ оған ештеме қоспайсыз деді. Сосын бізге черновой бермейді екен. Бізге дайынын береді деді.

Жауапты мамандардың айтуынша, тұрғындарға баспанамен қамтамасыз етудің үш нұсқасы ұсынылады.

Темирлан Нихамбаев, «СПК «Алматы» АҚ баспасөз хатшысы:

Қоныс аудару бойынша тұрғындарға үш нұсқа ұсынылады. Біріншісі – бөлме санына қарай жаңа пәтерге айырбастау. Екіншісі – жаңа үй салынып біткенше уақытша баспанамен қамтылып, кейін сол жерден дәл сондай басқа пәтер беріледі. Үшінші нұсқа – мүлік иесі тұрғын үйді нарықтық бағамен инвесторға сата алады.

Жыл басынан бері реновация бағдарламасы бойынша 432 пәтер иесі жаңа үйге қоныстанған. Жыл соңына дейін бұл көрсеткішті мыңнан асыру жоспарланып отыр.

Сабыржан Мұхаметхан, құрылыс компаниясының бас директоры:

Төрт үй бұзылған. Орнына тоғыз қабатты үш үй салынды. 172 пәтер. Енді жоспар бойынша үшінші кезекте біз алты үйді бұзамыз. Орнына алты жаңадан 9 қабатты үй салынады.

Жалпы, тұрғын үйді жаңарту бағдарламасына 1930-1980 жылдары салынған, негізінен екі қабатты ескі және апатты үйлер енгізілген. Тізімде тұрғын үйлермен қатар коммерциялық және қоғамдық нысандар да бар. Бағдарлама толық жүзеге асса, мыңдаған алматылық қауіпсіз әрі жаңа баспанаға көшеді.