Өңдеу өнеркәсібіндегі өндіріс артып келеді

Елімізде өңдеу өнеркәсібіндегі өндіріс көлемі 16 трлн теңгеге жетті. Шикізаттық емес тауарлардың экспорты да 14 пайызға өскен.

Ал мемлекеттік және реттелетін сатып алулар шеңберінде отандық тауар өндірушілермен 82 млрд теңге сомасына 45 мыңнан астам шарт жасалды. Сонымен қатар «Самұрық-Қазына» қоры 390 млрд теңгеден асатын 286 ұзақ мерзімді келісімдер мен офтейк-келісімшарттарға қол қойды. Өнеркәсіп және құрылыс министрі Ерсайын Нағаспаевтың айтуынша, мемлекеттік қолдау шаралары Шымкенттегі трансформатор зауытының, Семей қаласындағы кабельдік тоқ өткізгіш өнімдер кәсіпорнының және Қарағандыдағы темір арқан зауытының өндірістік қуатын айтарлықтай көтеруге мүмкіндік берді.

Жаңа өндірістерді дамыту мақсатында 2023 жылдан бері өңдеу өнеркәсібін дамытуға бағытталған 623 жоба іске қосылды. Осының нәтижесінде елімізде бұрын өндірілмеген жаңа өнім түрлері шығарыла бастады.