Моңғолияда жанармай сатуға шектеу қойылды

Моңғолия бүгіннен бастап тамыздың 15-не дейін бензин сатуға шектеу қойды. Дәлірек айтсақ, айдың жұп күндері нөмірі нөлге, екіге, төртке, алтыға, сегізге аяқталатын автомобильдерге ғана жанармай құюға болады. Ал тақ күндері нөмірі бірге, үшке, беске, жетіге, тоғызға бітетін автомашиналарға жанармай сатылады. Мұны осы елдің Индустрия және минералдық ресурстар министрлігі хабарлады.

Айта кетсек, Моңғолияның өзі мұнай кеніштерінен кенде емес. Алайда сол шикізатты өңдейтін зауыт жоқ. Сондықтан бұл мемлекет мұнайын Қытайға сатып, бензиннің 80-90 пайызын Ресейден импорттайды. Ал «Рейтер» агенттігінің хабарлауынша, мұнай өңдеу зауыттарының айтарлықтай бөлігі соғыстан қираған Ресей жанармайды тіпті Мароккодан сатып алуға кіріскен.