Ел жаңалықтарына шолу

Tarlan Astana жеңіл рельсті көлік жүйесі іске қосылғаннан бері 500 млн теңгеден астам табыс әкелді. Маусым айында LRT қызметін 2,1 млн жолаушы пайдаланған. Айта кетейік, тасымалданушылар саны бойынша елордалық көлік желісі Алматы метросының көрсеткішіне жақындай түскен. Сарапшылар мұны желінің ұзындығымен байланыстырып отыр.

Қазақ тіліндегі архив құжаттары жасанды интеллект көмегімен цифрлық форматқа көшіріледі. Бұл іске отандық және шетелдік мамандар әзірлеген, мәтінді 99 пайызға дейін дәлдікпен танитын жүйе мүмкіндік бермек.  Қазір жоба аясында қазақ тіліндегі кітап, құжат және түрлі мәтіндерден тұратын 10 млрд-тан астам тілдік дерек жинақталған. Сондай-ақ 10 мың сағаттан астам аудиоматериал өңделді.

Ел халқының 44,5 пайызы дене шынықтырумен жүйелі түрде айналысады. 4 пен 17 жас аралығындағы 228 мыңнан астам бала спорт секцияларына тегін қатысады. Жалпы елімізде 526 спорт мектебі және 26,5 мың нысан жұмыс істейді. Үкіметтің мәліметінше, азаматтардың белсенді өмір салтын ұстануы халықаралық аренадағы жетістіктерге ықпал етеді. Жыл басынан бері қазақстандық атлеттер халықаралық жарыстардан 152 медаль жеңіп алды.

Қазақстан жасөспірімдер құрамасының 15 жастағы ойыншысы Кәрім Меңдіқанов Испанияның әйгілі «Барселона» клубымен келісімшартқа отырды. Бұл туралы ол әлеуметтік желідегі парақшасында жариялады. Айта кетейік, Кәрім 2022 жылдан бері Испаниядағы жергілікті футбол құрамасы сапында болды. Ал 2026 жылдың басында «Сант-Кугат»  командасына негізгі ойыншыларының біріне айналды. Бүгінде ала доп шебері Ұлттық құраманың жасөспірімдер командасында өнер көрсетеді.