Ақтөбе облысында дауылдан 300-дей нысан бүлінді

Ақтөбе облысының Байғанин ауданындағы Қарауылкелді ауылында болған қатты дауылдан 298 нысан бүлінген. Оның 254-і тұрғын үй, 14-і əлеуметтік, 24-і кəсіпкерлік нысан жəне 6 əкімшілік ғимарат бар. Арнайы комиссия шығын көлемін анықтап жатыр. Ал техникалық тексеру қорытындысы 27 шілдеге дейін дайын болады. Зардап шеккен тұрғындар уақытша баспанамен қамтамасыз етіліп, қажетті жағдай жасалған.

Ауылдағы газ, су, байланыс жəне электр желілері қалпына келтірілген. Құлаған байланыс мұнарасын жөндеу жұмыстары жалғасып жатыр. Облыс əкімі Асхат Шахаров қалпына келтіру жұмыстарын жылыту маусымына дейін аяқтауды тапсырды.