Мемлекет басшысы АҚШ президентімен телефон арқылы сөйлесті

Мемлекет басшысы Америка Құрама Штаттарының Президенті Дональд Трамппен телефон арқылы сөйлесіп, АҚШ тәуелсіздігінің 250 жылдығымен құттықтады. Әңгімелесу барысында тараптар екіжақты экономикалық ынтымақтастық және саяси ықпалдастық мәселелері жөнінде пікір алмасты. Қасым-Жомарт Тоқаев былтыр қараша айында Вашингтонға жасаған сапары барысында қол жеткізілген маңызды келісімдер жоғары қарқынмен жүзеге асырылып жатқанын атап өтті. Президент Қазақстанның ядролық қаруды және байытылған уранды таратпауға қатысты ұстанымынан айнымайтынын растады. Сондай-ақ халықаралық бақылау режимін нығайту мақсатында МАГАТЭ-мен арадағы байланыстың маңызына тоқталып, Дональд Трампты өзіне қолайлы уақытта Қазақстанға сапармен келуге шақырды.