Жас судьяларға арналған емтихан цифрлық форматқа көшірілді

Сот жүйесіне соңғы үлгідегі технологиялар енгізіліп, жас судьяларға арналған емтихан түбегейлі цифрлық форматқа көшірілді. Бұл туралы Орталық коммуникациялар алаңында өткен арнайы брифингте мәлім болды.  Енді талапкерлер емтиханды бұрынғыдай ұзақ уақыт күтпейді. Өйткені, ай сайын ұйымдастыруға мүмкіндік бар. Емтихан 5 кезеңде өтеді: тест, эссе жазу, практикалық кейстерді шешу, психологиялық тест және әңгімелесу. Тестің мазмұны толық жаңартылды. Мыңға жуық жаңа тапсырма әзірленіп, тәуелсіз ғылыми сараптамадан өтті. Мұның бәрі заң үстемдігі мен әділ төрелікті қамтамасыз етуге сеп болады, дейді Жоғарғы сот кеңесінің мүшелері.

Ең басты нәтижелердің бірі – сот жүйесінде ұзақ уақыт қордаланған кадр тапшылығы мәселесі шешілді. Жасыратыны жоқ, бірнеше жыл блойы сот жүйесінде судьялардың тапшылығы сақталды. Бұл тәжірибелі судьялардың жұмыстан кетуіне алып келді. Сондықтан біздің міндетіміз – кадр тапшылығын одан әрі азайту.