Реформаларға арналған кітап пен аналитикалық жинақ шықты

Бүгін Астанада Сенат Төрағасы Мәулен Әшімбаевтың «Реформалар мәні. Қазақстанның болашақ тарихының жеті тарауы» атты кітабы және «Талдау мектебі» жобасының  қатысушылары  әзірлеген «SMART GOVERNANCE» аналитикалық баяндамалар жинағы көпшілікке таныстырылды. Жаңа еңбектерде урбанистика, энергетика, экология, ауыл шаруашылығы, білім және мемлекеттік басқару сияқты негізгі бағыттар бойынша зерттеулер қамтылған. Сарапшылардың айтуынша, кітаптар мемлекеттік басқаруда деректер мен жасанды интеллектті тиімді қолдануға арналған маңызды талдау құралы болмақ. Тұсаукесер барысында аналитикалық ойлау мен жаңа буын мамандарын даярлаудың маңызы атап өтілді.

«Реформалар мәні. Қазақстанның болашақ тарихының жеті тарауы» кітабы Президентіміз Қасым-Жомарт Кемелұлы Тоқаевтың бастамасымен жүзеге асырылып жатқан кешенді жаңғырту бағдарламасына арналған. Еңбектің әр тарауында Мемлекет басшысының ауқымды реформалар бағдарының негізгі бағыттарына талдау жасалады. Ішкі саясат пен экономика, өңірлік даму мен ұлттық бірегейлік, парламенттік реформалар және Қазақстанның халықаралық аренадағы орны зерделенді. Алайда кітаптың басты өзегі реформалардың мәнін, олардың философиялық негіздері мен жаһандық маңызын талдау екенін атап өткен жөн.