ЕҰУ-де Алтын Орда өркениеті кафедрасы ашылады

Еуразия ұлттық университетінде Алтын Орда өркениеті кафедрасы ашылады. Жаңа оқу бөлімі Жошы ұлысына қатысты тың деректерді білім беру бағдарламасына енгізумен айналысады. Ғалымдар кафедра болашақта еліміздегі жоғары оқу орындары мен ғылыми орталықтарды біріктіретін академиялық алаңға айналатынына сенімді. Алтын Орда мұрасын зерттеу – тарихи сананы нығайтуға, қазақ мемлекеттілігінің терең тамырын ғылыми негізде түсіндіруге бағытталған маңызды жұмыс. Жақында өткен халықаралық симпозиумда Президент ғалымдарға нақты міндет жүктеді. Енді осы бағыттағы шетелдік зерттеушілердің жұмысын зерделеуге де баса мән берілмек.

Батыс Еуропада, Америкада, тіпті шығыстағы Қытай және Жапония елдерінде Алтын Орда кезеңіндегі Юань патшалығы, Жошы ұлысы тарихына қатысты көптеген зерттеу кезінде жазылған. Біз отандық тарих ғылымында Жошы ұлысы Алтын орда кезеңін зерттеуде көбінесе батыста бізге беймәлім болып келген зерттеушілердің еңбектерін ғылыми айналымға көбірек келтіруіміз керек. Өйткені олардың еңбектерінде біржақты идеалогиялық, кертартпа түсініктер жоқ. Кеңес одағында қолжетімсіз болған немесе жойылып кеткен көптеген тарихи деректерді батыс архивтері сақтап қалған.