Сенат төрағасы университет түлектеріне диплом табыстады

Парламент Сенатының төрағасы Мәулен Әшімбаев Назарбаев университеті түлектеріне диплом тапсыру рәсіміне қатысты. Ол жас мамандарды құттықтап, елімізде жүзеге асып жатқан реформалар мен жаңғыру үдерістерінде жастардың рөлі ерекше екенін атап өтті.  Мемлекет басшысы Қасым-Жомарт Тоқаевтың бастамасымен қолға алынған саяси және әлеуметтік-экономикалық реформалардың маңызына тоқталды. Сонымен қатар Назарбаев университетінің ғылым мен инновацияны дамытуға қосып отырған үлесін жоғары бағалап, кәсіби біліктілік пен үздіксіз ізденіс табыстың басты кепілі екенін жеткізді.

Прогрессивті Қазақстан құруға бағытталған саяси бағдары – ұзақмерзімді реформалар бағдарламасы. Ол экономиканы әртараптандыру, мемлекеттік басқару институттарын нығайту, ғылым мен білімге, бизнес пен азаматтық қоғамға қолдау көрсету сияқты маңызды міндеттерді шешу үшін бүкіл қоғамның жұмылуын және белсенді қатысуын талап етеді. Осы үдеріске сіздердің университеттеріңіздің түлектері қазірдің өзінде елеулі үлес қосып келеді.