Халықтың сот жүйесіне сенімі артты

Халықтың сот жүйесіне сенімі артты. Жоғарғы Сот төрағасы Асламбек Мерғалиев осылай деді. Ұлттық статистика бюросының деректерін алға тартқан ол, сот органдарына толық сенім білдіретін азаматтардың үлесі 63,2 пайызға жеткенін хабарлады. Бүгін Астанада «Әкімшілік әділет және оның заң үстемдігін қамтамасыз етудегі рөлі» атты форумы өтті. Шарада билік және бизнес өкілдері өзекті түйткілдерді ашық талқылады. Жиын жайын тілшіміз Нұрсұлтан Тілектес тарқатып айтсын.

Әкімшілік сот саласындағы реформаның тиімділігін көре бастадық. Ұлттық статистика бюросының дерегіне сай сот органдарына толық сенім білдіретін азаматтардың үлесі 63,2 пайызға жеткен. Ал 2023 жылы бұл көрсеткіш 55 пайыз болған.

Бұрынғы кезеңдегі айтылып жүрген сын, сынауларға қараған кезде қазір ол жағынан кішкене саябырсыды десек болады. Әрқашан ол сотта екі тарап болады, біреуі қанағаттанады, біреуі қанағаттанбай шығады. Сондықтан әрине реніш болып тұрады. Бірақ жүйелі түрде айтылған пікірлер, белгілі бір деңгейде ескеріліп, сот жүйесінде үлкен өзгеріс болып жатыр деп ойлаймын. Судьяларға сенім бар.

Сарапшылардың айтуынша, азаматтардың құқықтарын қорғау тетіктерінің күшеюі де бұл үрдіске әсер еткен. Бүгінде қарапайым азаматтар мен кәсіпкерлер мемлекеттік органдардың шешімдеріне сот арқылы шағымданып, өз құқықтарын қорғай алады. Ресми мәліметке сәйкес, мұндай даулардың 50 пайызы азаматтар мен бизнес өкілдерінің пайдасына шешілген.

Бұл соттардың жалпы оң бағалануына және қоғам тарапынан қолдау табуына ықпал етті. 2021 жылы жаңа Әкімшілік рәсімдік-процестік кодекс қабылданды. Ол бұрын республика аумағында қолданыста болған кодекстерден түбегейлі ерекшеленеді. Аталған кодекске соттардың әділ шешімдер қабылдауына негіз болатын міндеттер мен қағидаттар енгізілді.

Қазақстанда әкімшілік әділет институты инвесторлардың құқықтарын қорғаудың қолжетімді әрі тиімді тетігі саналады. Бұл институт мемлекеттік органдар шешімдерінің заңға сәйкестігін қамтамасыз етіп, инвесторларға құқықтық айқындық пен сенімділік береді. Біздің Қазақстан нарығына кіргенімізге 16 жылға жуықтады. Біз «ҚТЖ»-ға локомотивтер жеткіземіз. Салаға 300 млн доллар инвестиция салдық. Биыл тағы 50 млн доллар құюға әзірміз.

Ең бастысы еліміздегі соттар тәуелсіз болуы керек. Бұл еліміздің бағыт алған бағдары – Әділетті Қазақстан құру идеясының алғышарты, - деді Президент.