Шымкентте 106 заңсыз құрылыс нысаны анықталды

Шымкентте жүзден астам заңсыз құрылыс нысаны анықталды. Олардың бірқатары сот шешімімен сүрілуі мүмкін. Құрылыс нормалары мен заңнама талаптарының сақталмау деректері көбіне Абай ауданында тіркелген. Заңбұзушылықтардың басым бөлігі дүкен, қонақүй, дәмхана және техникалық қызмет көрсету орталығы сияқты кәсіпкерлік нысандарға тиесілі. Қазіргі уақытта 72 меншік иесіне айыппұл салынып, құрылыс жұмыстарын тоқтату туралы нұсқама берілді. Сондай-ақ заңбұзушылықтарды жоюға міндеттелді. Тексеру қорытындысында бюджетке 147 миллион теңгеден астам қаржы өндірілген.

Досхан Садықов, қалалық Орта сапасы және бақылау басқармасының бөлім басшысы:

Объектілердің ішінде мүлдем сәулет жоспарлау тапсырмасын алмай, жерге тиісті рұқсат құжаты болмаған жағдайда объект сот тәртібімен бұзуға жолданады. Он шақты нысан тиісті жерге құжаты жоқ. Бұл жұмыстар тұрақты жалғасын табады. Басқарма тарапынан тұрақты түрде жүргізіледі.