Жетісу облысында алаяқтыққа күдіктілер ұсталды

Жетісу облысында алаяқтық схемасына адамдарды тартып жүрген 3 күдікті қолға түсті. Тергеу мәліметінше, олар тұрғындардың банк карталары мен жеке мәліметтерін заңсыз пайдаланып, оңай ақша табуға үгіттеген. Күдіктілер адамдардың сеніміне кіріп, оларды қитұрқы әрекеттеріне құрал ретінде пайдаланған. Қылмыстық жолмен табылған қаражат сол адамдардың есепшоты арқылы өткізіліп, кейін қолма-қол ақшаға айналдырылып отырған. Жалпы жыл басынан бері өңірде осындай заңсыз іске қатысы бар 10 адам қамауға алынды. Қазіргі таңда олардың алтауына қатысты қылмыстық іс сотқа жолданып, тергеу амалдары жалғасып жатыр.

Қылмыстық әрекеттер нәтижесінде 20-дан астам жәбірленушіге 24 млн теңге көлемінде залал келтіріліп, оның 9 млн-нан астам теңгесі өтелді. Облыс прокуратурасымен облыстық Полиция департаменті интернет алаяқтыққа қарсы іс-қимыл жасау және дропперлік факторлардың жолын кесу бағытында жүйелі жұмысын жалғастыруда.