Облыста егін науқаны қызу жүріп жатыр

Ақмола облысында егін науқаны қызу жүріп жатыр. Диқандар өңірдегі 5 млн гектардан аса алқаптың шамамен 46 пайызына дән сеуіп үлгерді. Көктемгі егіс жұмыстары 15 күнде аяқталмақ.
Атбасар ауданында көктемгі егіс жұмыстарына екі мыңнан астам техника жұмылдырылған. Жергілікті шаруа 9 мың гектардан астам алқаптың 60 пайызына тұқым сепкен. «Кең дала 2» бағдарламасы бойынша 683 миллион теңге көлемінде жеңілдетілген несие алған серіктестік, осы қаржының арқасында көктемгі дала жұмыстарын ерте бастадық ,-дейді. Жалпы, биыл өңірдегі ауылшаруашылығы тауарын өндірушілерге 104 миллиард теңге бөлінген. Былтыр ақмолалық шаруалар 7,6 миллион тонна бидай жинап, рекорд орнатқан еді.
Ғалымжан Әріпов, шаруа:

Егіс науқанын 6- мамырда күнбағыс егуден бастадық. Биыл жалпы егістік алқабының 35 пайызына майлы дақыл, 25-не бұршақ, ал 40 пайызына дәнді дақылдар сіңірмекпіз. Яғни, егіс алқабын әртараптандыруға көңіл бөліп отырмыз. Биыл топырақтағы ылғал қоры жақсы сақталған. Қазір жоспарланған алқаптың шамамен 60 пайызына дән сіңірілді.