Трамп Тегеранның бейбітшілік туралы ұсынысын қабылдамады

АҚШ президенті Дональд Трамп Иранмен арадағы ымыраның тағдыры қыл үстінде тұрғанын мәлімдеді. Бұның алдында Құрама Штаттар лидері Тегеран ұсынған бейбітшілік жоспарын қоқысқа теңеп, оны «ақылға қонымсыз» деп атады. Кейбір сарапшылардың ойынша, Трамптың Иран ұсыныстарынан дереу бас тартуы 10 апта бұрын басталған қарулы жанжалды әрі қарай созып, Ормұз бұғазындағы кемелер қозғалысын қалпына келтіруді тіпті қиындатуы мүмкін.

Иран сыртқы істер министрлігі болса, Вашингтонға заңды ұсыныстар айтқанын мәлімдеді. Айта кетсек, Ислам Республикасы АҚШ-қа Пәкістан арқылы жіберген жоспарында әскери шабуыл үшін өтемақы төлеу, өзін санкциялардан және теңіз блокадасынан босату, сонымен қатар Иран мұнайын сатуға қайта жол ашу тәрізді талаптар қойып отыр.