Дағыстанның тоғыз ауданында төтенше жағдай режимі енгізілді

Көктемгі су тасқынына байланысты Дағыстанның тоғыз ауданында төтенше жағдай режимі енгізілді. 50 мыңнан астам адам тасқыннан зардап шегіп, келтірілген шығын төрт миллиард рубльге жетті. Мыңдаған тұрғын әлі су, жарықсыз отыруға мәжбүр. Төтенше жағдайға байланысты Ресейдің аймақтары Дағыстанға жылу жинай бастады. Көктемгі су тасқынының үшінші толқыны Шешенстан Республикасына да әсер етті. Су жолдарды шайып, төрт мың үй су астына кетті. 39 елді мекен қауіпті аймақта орналасқандықтан, тұрғындар эвакуацияланып жатыр.