Қазақ пен қырғыз өнері бір алаңда: «Нұр шашу» көрмесі ашылды

Қазақ пен қырғыз өнері бір алаңда тоғысты. Астанада «Нұр шашу» атты халықаралық көрме ашылды. Оған Қазақстан мен Қырғызстанның суретшілері қатысып жатыр. Жалпы саны 60-тан астам картина қойылған.

Көрменің басты ерекшелігі – сыртқы атмосферадан гөрі адамның ішкі жан дүниесіне басымдық берілуі. Яғни, әр шығарма – бүгінгі қоғамның бет-бейнесі, үміт пен рухани ізденістің көрінісі. Мұнда әр суретші өз стилімен ерекшеленеді. HAS Sanat галереясында басталған арт-жоба 11 мамырға дейін жалғасады.

Біз Қырғыз Республикасының атақты суретшілері Сүлейменқұл Чокморов, Сабырбек Ақыблеков, Семен Чуйков, Ғапар Айтиев сынды тұлғалардың дәстүрін жалғаған туындыларды көріп отырмыз. Әсіресе күрделі кезеңде адамның жанына сәуле түсіріп, жүрегін нұрландыратын шығармалардың көрмесі өтіп жатқаны қуантады.

Күнделікті тіршілікті суреттегенді жақсы көремін. Ағайынға деген сағыныш тек туысқа емес, тұтас ауылға, елге деген сағыныш. Ал шынайы өмірді түсіну үшін ең алдымен сол қарапайым тіршілікті көре білу керек.