Биыл елімізде 90 жаңа мектеп бой көтермек

Биыл Қазақстанда шамамен 47 мың оқушыға арналған 90 жаңа мектеп салу жоспарланып отыр. Оқу-ағарту министрлігі осындай жоспарын бөлісті. Былтырғы жылдың қортындысы бойынша, елде 236 мың оқушыға арналған 162 мектеп бой көтерген. Сондай-ақ қолданыстағы орта білім ордаларының ғимараттары жаңғыртылып жатыр. Мысалы, 2029 жылға дейін 1300 мектеп күрделі жөндеуден өтуі керек. Ал «Келешек мектептері» ұлттық жобасы аясында 460 мың орындық 217 мектеп салынған. Мұндай білім ордалары қолданыстағы ғимараттарға қарағанда 15-20 пайызға кең, техникалық жабдықталуы төрт есе жоғары. «Бұл оқушылардың заман талабына сай білім алуына мүмкіндік береді», дейді жауапты министрлік өкілдері.