Үкіметте Қостанай облысының әлеуметтік саласын дамыту мәселелері қаралды

Қостанай облысында дуальды оқыту жүйесі сәтті жүзеге асып жатыр. Қазір өңірдегі 30 коллледжбен 600-ге жуық кәсіпорын осы бағытта жұмыс істеп жүр. Яғни, студенттер алған білімін тек теория түрінде емес, кәсіпорынға барып, практикалық бағытта шыңдайды. Мәселен, «Автомобиль өнеркәсібінің инжинирингі» бағдарламасы аясында оқыған 22 студенттің 17-сі бүгінде жұмыс істеп жүр.Бұл жөнінде Үкіметте өткен басқосуда мәлім болды. Премьер-Министр орынбасары – Мәдениет және ақпарат министрі Аида Балаеваның төрағалығымен өткен жиында Қостанай облысының әлеуметтік саласын дамыту мәселелері қаралды. Өңірдің денсаулық сақтау саласында да нәтиже бар. Мәселен, туберкулезден болатын өлім-жітім 7,1%-ға төмендеген. Ал туризм саласында Қостанай облысының әлеуеті зор болғанымен, туристік инфрақұрылымды дамыту мәселелері де өзекті. Сондай-ақ инклюзивті спортты дамытуға да ерекше назар аудару қажет екені атап өтілді. Кеңес қорытындысы бойынша Премьер-Министрдің орынбасары профилактикалық және ақпараттық-түсіндіру жұмыстарын күшейту, кадрлық әлеуетті дамыту, сондай-ақ әлеуметтік саланың негізгі бағыттары бойынша кешенді шараларды іске асыруды тапсырды.