Өмірлік маңызы бар дәрілердің тұрақты қорын құру ұсынылды

Сенатор өмірлік маңызы бар дәрілердің тұрақты қорын құруды ұсынды. Себебі науқасқа қажетті дәрі уақытында жетпей қалады. Салдарынан ем-дом дұрыс жүргізілмейді. Осындай дәрі-дәрмек тапшылығына тап болмау үшін Сенат депутаты Айнұр Арғынбекова нақты ұсыныстарын берді. Депутаттық сауалында препараттарға қатысты проблемаларды шешу үшін дәрі-дәрмекпен қамтамасыз етуді мемлекеттің стратегиялық жоспарлау жүйесіне қосуды, өмірлік маңызы бар препараттардың ең аз қорын қалыптастыруды қамтамасыз етуді және жеткізудегі үзілістер кезінде іс-қимылдың нақты алгоритмдерін әзірлеуді ұсынды.

Айнұр Арғынбекова, ҚР Парламенті Сенатының депутаты:

Мысалы, созылмалы ауруы бар пациент жоспарлы қабылдауға келеді. Ем-дом тағайындалған, алайда қажетті препарат жоқ. Сондықтан дәрігер медициналық емес, ұйымдастырушылық себептермен емдеу схемасын өзгертуге мәжбүр болады. Мұндай олқылықтар дәрі-дәрмек саясатының жүйелі мәселелерін - импортқа жоғары тәуелділікті, тіркеу, баға белгілеу және сатып алу саласындағы шешімдердің шашыраңқылығын, жеткізудің осалдығын, дәрі-дәрмекпен қамтамасыз ету саласында ұзақмерзімді әрі жүйелі стратегияның жоқтығын көрсетеді.