Басты Жаңалықтар «Қайрат» тарихи матч өткізді

«Қайрат» тарихи матч өткізді

29.01.2026 13:30

«Қайрат» UEFA Чемпиондар лигасының негізгі кезеңіндегі соңғы матчында Англияның атақты «Арсенал» клубына қарсы ойнап, 2:3 есебімен жеңілді. Десе де бұл матчты қазақстандық жанкүйерлер тарихи ойынға балап жатыр. Өйткені матчта сенсациялық нәтиже тіркелді.

Қос команда UEFA Чемпиондар лигасының негізгі кезеңінің сегізінші турында кездесті. Ойынның 2-минутында «Арсенал» сапынан Виктор Дьёкереш мергендік танытып, есеп ашты. Ал «Қайрат» тез жауап қатты: 7-минутта айып алаңындағы ереже бұзудан кейін Жоржиньо пенальтиді сәтті орындап, таразы басын теңестірді.

Алайда бірінші таймның ортасында лондондық клуб қайта басымдыққа ие болды – Кай Хаверц 15-минутта гол соқса, 33-минутта Габриэл Мартинелли есепті ұлғайтып, «Арсеналды» есепте алға шығарды. Екінші таймда алматылық команда жақсы ойын көрсетті, алайда шешуші сәттерде дәлдік жетіспеді. Ал матчтың ең соңында, 93-минутта «Қайрат» сапынан Рикардиньо гол соғып, есеп айырмасын қысқартты.

«Қайрат» осымен Чемпиондар лигасын аяқтады. Дегенмен бұл жеңіске бергісіз жеңіліс. Өйткені алматылық клуб Ағылшын премьер-лигсының алыбы, үздігімен ойнады. «Арсенал» маусым бойы турнирде «Атлетико Мадрид», «Интер» және «Бавария» сынды азулы командалармен ойнап, тек екі гол жіберген еді. Ал «Қайрат» лондондық клуб қақпасына бір ойында-ақ екі рет дәл соққы жасап, сенсациялық көрсеткіш тіркеді.

Автор

Нұрсұлтан Тілектес

Бөлісу