Анталияда дүлей дауыл соқты

Түркияның Анталия қаласына қарасты Манавгат ауданында дүлей дауыл ағаштарды қопарып, шатырларды ұшырды. Теңізде басталған дауыл жағалауға жетіп, әп-сәтте қаланың астан-кестеңін шығарған. Бір мешіттің мұнарасы құлап, мешіт жанындағы ғимараттың үстіне түсті. Дауылмен бірге келген нөсер жаңбырдан көшелерді су басып, көлік қозғалысы қиындады. Бірқатар ғимараттың төменгі қабаттарына су кірген. Сондай-ақ айлақта тұрған ондаған қайық пен яхта су астына кетті. Ал үстіне шатырдың бөлшегі құлаған бір адам ауыр жараланып, ауруханаға жеткізілді.

Ахмет, жергілікті тұрғын:

Дауылдан кейін көшеден адамдардың дауысын естіп шықтым. Бір көршіміз үйден ұшқан шатырдың астында қалған екен. Дем ала алмай жатты. Бірнеше адам оны көтеріп алып шықтық. Сосын жедел жәрдем алып кетті.