Испаниялық танымал журнал Шымбұлақ пен Медеуді жоғары бағалаған

Испанияның беделді Viajar туристік журналы Алматыны әлемдегі ең бірегей таулы қалалардың қатарына қосты. Бұл туралы қала әкімдігі хабарлады. Басылым бетінде жарияланған мақалада Алматы тау шаңғысы инфрақұрылымы дамыған Австриядағы Инсбрук, Зальцбург, Франциядағы Гренобль шаһарларымен қатар аталған. Мақала авторлары әсіресе Шымбұлақ тау шаңғысы курорты мен Медеу спорт кешеніне ерекше назар аударыпты. Қаладан тікелей жетуге болатын заманауи аспалы жол теңіз деңгейінен 3 мың метрден астам биікке көтеріп, Іле Алатауының көркем келбетін көрсетеді. Ал таулы ашық мұз айдыны орналасқан Медеу кешені бірегей табиғи орта мен спорттық инфрақұрылымды үйлестіре отырып, қонақтарға ұмытылмас әсер сыйлайды деп жазған.