Мерзімді әскери қызметтегі азаматтарға несие берілмеуі мүмкін

Мерзімді әскери қызметтегілер бұдан былай несие ала алмауы мүмкін. Қаржы нарығын реттеу және дамыту агенттігі тиісті қаулы жобасын әзірлеп, қоғамдық талқылауға ұсынды. Қаулы банктер мен микроқаржы ұйымдарын несиеге өтінім қабылдау кезінде азаматтың әскери мәртебесін тексеруге міндеттейді. Сондай-ақ құжатта мерзімді әскери қызмет өткеріп жүрген әскери қызметшілерге қатысты Қорғаныс министрлігі мен кредиттік бюролар арасындағы ақпарат алмасу тәртібі белгіленген. 2025 жылдың қараша айындағы ақпаратқа сүйенсек, мерзімді қызметтегі әскери қызметшілер қаржы ұйымдарына 9 миллиард теңге қарыз. Қаулы жобасы «Ашық нормативтік құқықтық актілер» порталында 3 ақпанға дейін қоғамдық талқылауға шығарылған.