ШҚО-да кей ауылдарда аяз -43-45 градусқа жетті

Аяз әлі басылмай тұр. Әсіресе Шығыста. Өткен түнде өңірдегі Алтай, Самар, Марқакөл және Қатон-Қарағай аудандарындағы кейбір ауылдарда термометр бағаны -43-45 градус суықты көрсетті. Аязы қатты бұл елді мекендердің көбі Бұқтырма мен Ертістің жағасына қоныстанған. Сондықтан аяз күшейген ауылдардағы оқушылар сабақты үйден оқып жатыр. Бүгін облыстағы барлық аудан мен қаладағы орта мектеп онлайнға көшті. Кеше кешкі сағат 20:00-ден бүгін таңғы 8-ге дейін дизельмен жүретін автокөліктердің жүруіне шектеу қойылған. Қазір барлық бағыт ашық. Ал облыстағы жылу мен энергия беретін стратегиялық нысандар мен коммуналдық мекемелер қалыпты жұмыс істеп тұр.