Архив ісін цифрландыру және балаларды зиянды контенттен қорғауға бағытталған заң қабылданды

Сонымен қатар Мемлекет басшысы архив ісі саласындағы заңнаманы жетілдіруге, мемлекеттік архивтердің мәртебесі мен қызмет тиімділігін арттыруға, сондай-ақ балалардың құқықтарын қорғауға бағытталған заңға қол қойды. Құжатта архивтік құжаттарды электрондық форматта сақтау, көшіру және басқару тәртібі бекітілді. Тарихи-мәдени және ғылыми құндылығы бар аудиовизуалдық құжаттардың міндетті даналарын мемлекеттік архивтерге тапсыру нормасы да енгізілді. Мемлекеттік архивтерге «Ұлттық» мәртебе беру арқылы олардың материалдық-техникалық базасын нығайтуға және сала қызметкерлерінің жалақысын арттыруға мүмкіндік жасалмақ. Құжатта балаларды қорғауға ерекше көңіл бөлінген. Қоғамдық кеңістікте, БАҚ-та және онлайн-платформаларда педофилияны және дәстүрлі емес сексуалдық бағдарды насихаттайтын ақпаратты таратуға шектеу қойылады. Бұл ұғымдарға нақты анықтамалар беріліп, олар заңға қайшы контент ретінде танылды. Осылайша, Еңбек кодексіне және тағы 12 заңға өзгерістер мен толықтырулар енгізілді.