Батыс Қазақстанда мұз ойылып, жүк көлігі суға батып кетті

Батыс Қазақстан облысында жүк тиелген «ГАЗель» көлігі суға батып кетті. Оқиға Шаған өзені тұсындағы Бәйтерек ауданы Октябрьское ауылы маңында болған. Жүргізуші айналма жолмен жүрмей, мұз үстімен төтесінен өтпек болған. Алайда жұқа мұз көліктің салмағын көтере алмаған. Абырой болғанда, жүргізуші дер кезінде көліктен шығып үлгерген. Қасында басқа ешкім болмаған, зардап шеккендер жоқ. Құтқарушылар мұзды кесіп, сүңгуірлер арқанды жүк көлігіне бекітіп, судағы көлікті сүйреп алып шықты. Жүргізушіге әкімшілік хаттама толтырылып, 13 мың 800 теңге айыппұл салынды.