Басты Жаңалықтар Халықаралық панорама: Қырғызстан, Украина және бейбітшілік күн тәртібі

Халықаралық панорама: Қырғызстан, Украина және бейбітшілік күн тәртібі

14.12.2025 20:11

Қырғызстан Конституциялық соты президенттің өлім жазасын қайтару туралы бастамасын кері қайтарды.

Садыр Жапаров Конституцияға балаларды зорлап және өлтіргендерді өлім жазасына кесуді қарастыратын өзгеріс енгізсе, қалай болады? – деп сауалды екшеуді сұраған.

Сот бұл ұсыныстың Конституцияның негізгі қағидаттарына және елдің халықаралық міндеттемелеріне қайшы келетінін, сондықтан референдумға ұсынылмайтынын мәлімдеді.

Осы күзде кезекті рет қыз бала айуандықпен өлтірілген соң, Қырғыз президенті өлім жазасын қайтару керек деген.

Бүгін Америка мен Украина Берлинде бейбітшілік бойынша келіссөз өткізуге келіскен. Д.Трамп арнайы өкілі Стив Уиткофф пен күйеу баласы Джаред Кушнерді жіберетінін айтқан. Ал бұл тақырыпқа орай бүгіннің маңызды жаңалығы – ЕО ресей активтерін мерзімсіз уақытқа, бейнелеп айтқанда, «қатырып» қойды. Ресей Украинаға толық репарация төлемей, 210 млрд доллар Еуропа аумағынан шықпайды.

Ал ертең сол Берлинде Еуроодақ елдерінің басшылары, Солтүстік альянс ұйымының бас хатшысы Марк Рютте және Владимир Зеленский кездеседі. Бейбітшілік келісімі бойынша жүріп жатқан келіссөздер, әрине, үмітті сөндірмейді.

Дегенмен ең маңызды мәселелер – жер және Украинаның қауіпсіздігіне кепіл беру сұрақтары оңайлықпен шешілмейтіні анық. Оның үстіне Д.Трамп Украинада сайлау өткізуді қайтадан талап ете бастады.

Соғыс жүріп жатыр. Миллиондаған украин босып кетті. Қалай? Бірақ Трамппен айтысудың құны жоғары екенін білетін В.Зеленский «сайлау өткізуге дайынбыз, алайда ол үшін АҚШ пен өзге де одақтастар сайлауды өткізуді қамтамасыз етсін» деп мәлімдеді.

Автор

Жайна Сламбек

Бөлісу