Жамбыл облысында қар құрсауында қалған 19 адам құтқарылды

Жамбыл облысы, Қордай ауданында қар құрсауында қалып қойған 19 адам құтқарылды. Олардың біреуі – бала. Суыра соққан жел «Батыс Еуропа – Батыс Қытай» дәлізіне қалың қар үйіп тастаған. Салдарынан жолаушылар мінген жеңіл көліктер жүре алмай қалған. Автокөлік жүргізушілері жолдардың жабылуы туралы ескертулерді елемеген.

Сондай-ақ полицейлер қатты аяз салдарынан жанармайы қатып қалған жолаушылар автобусына көмек көрсетті. Қазір Қордай ауданындағы автожолдарда шамамен 700-ге жуық автокөлік тұр. Өйткені кеше қатты боран салдарынан жаңа және ескі Қордай асуы барлық көлік түрлері үшін жабық болды. Ал Түркістан облысы бағытындағы автожол ашық.