Үкімет педагогтарды даярлау ісіне бақылауды күшейтеді

Университеттерде мұғалімдер мен тәрбиешілердің кәсіби деңгейінің төмендігі мектептердегі білім сапасының әлсіреуіне әсер етіп отыр. Премьер-Министрдің орынбасары – Мәдениет және ақпарат министрі Аида Балаеваның төрағалығымен өткен кеңесте білім беру жүйесіне кадрлар даярлау мәселесі қаралды.

Ел бойынша 52 университет мұғалімдерді оқытып жатқанымен, кадр тапшылығы әлі де шешілмеген. Осыған байланысты жауапты мамандарға педагогикалық білім беру тұжырымдамасын қайта қарау, өндірістік тәжірибеден өтуді жүйелеу, грант бөлу және оқулықтар даярлау ісін жақсарту тапсырылды.