Футболдан Әлем чемпионатының жеребе тарту рәсімі өтеді

5 желтоқсан, яғни жұма күні келер жылы өтетін футболдан Әлем чемпионатының жеребе тарту рәсімі өтеді. Вашингтонда болатын спорттық шараны «Qazaqstan» Ұлттық телеарнасы сағат 22:00-де тікелей эфирде көрсетеді. Жаһандық дода қатысушы ел санымен есте қалмақ. Нақтырақ айтқанда, аладоп бәсекесінде 48 елдің командасы бақ сынайды. Біріншілік жаңа ереже бойынша ұйымдастырылады. Жеребе бойынша 4 командадан тұратын 12 топ жасақталады. Әр топтан бірінші және екінші орын алған командалар автоматты түрде плей-оффқа жолдама алады. Қалған 8 жолдама үшінші орын алған және ең көп ұпай жинаған ел құрамаларына бұйырады. Ойындар Канада, АҚШ және Мексиканың 16 қаласында өтеді. Чемпионат 11 маусымда басталып, 19 шілдеде аяқталады. Матчтарды «Qazaqstan» және «Qazsport» телеарналары тікелей эфирде көрсетеді.