Бішкектегі ҰҚШҰ саммиті: Ұйымға енді Ресей төрағалық етеді

Бішкекте Ұжымдық қауіпсіздік шарты ұйымының саммиті өтті. Бұл ұйымға Ресей, Беларусь, Қазақстан, Қырғызстан, Тәжікстан және Армения мүше.

Бішкек саммитінде оған дейін белгілі болған ауыс-түйіс іске асты: Президенттердің тағайындауымен жаңа жылдан бастап ұйымның Бас хатшысы қызметін 3 жыл Қырғызстанның өкілі Таалатбек Масадыков атқарады. Соңғы 3 жыл Бас хатшы Қазақстан өкілі Иманғали Тасмағамбетов болғаны мәлім.

Ал ұйымға төрағалық ету өкілеттігі Ресейге өтті. Ресей президенті ҰҚШҰ ұжымдық күштерін «қазіргі заманғы ресейлік қару-жарақпен» қайта жарақтандыруға арналған ауқымды бағдарламаны іске қосуды ұсынған...

Ресми хабарламада: «Отырыс қорытындысы бойынша Ұжымдық қауіпсіздік кеңесінің декларациясы қабылданды... Бірқатар құжатқа қол қойылды» деген.

Бүгін еліміздің СІМ Новороссийскідегі КТК инфрақұрылымына шабуылға байланысты Украинаға наразылық мәлімдемесін жариялады.

«Бұл оқиға халықаралық құқық нормаларымен қорғалатын азаматтық нысанға қарсы жасалған үшінші агрессиялық акт болып отыр... Каспий құбыр консорциумы әлемдік энергетикалық жүйенің тұрақтылығын сақтауда айрықша орын алатынын атап өтеміз», – деген.

Сонымен бірге наразылық хатта Қазақстан мен Украинаның «екіжақты қатынастарына залал келтіретін әрекет ретінде» бағалап, «мұндай жағдайлардың қайталануына жол бермеу бойынша нақты шаралар күтеміз» деп жазған.

Кеше Украинаның экипажсыз катерлері Новороссийскідегі Каспий құбыр консорциумының теңіз терминалының айлақ құрылғысын қиратқан. Тиісінше, мұнай тиеу тоқтады.

Еліміздің Энергетика министрлігі мұнайды «балама жолдармен» тасуды қарастырып жатқанын мәлімдеді. Ол, әрине, Баку–Тбилиси–Жейһан құбыры.