ҰҚШҰ Ұжымдық қауіпсіздік кеңесінің кеңейтілген отырысы өтті

Мемлекет басшысы Бішкекте өткен Ұжымдық қауіпсіздік кеңесінің кеңейтілген құрамдағы отырысына қатысты. Қазақстан, Беларусь, Қырғызстан, Ресей және Тәжікстан басшылары Ұйымға мүше елдердің қауіпсіздік мәселелерін талқылап, атқарылған жұмыстарды қорытындылады. Сондай-ақ болашаққа бағдар жасады. Президенттер Ұйымның Бас хатшысы қызметін аяқтап жатқан Иманғали Тасмағамбетовке алғыс білдірді. Жиында 1 қаңтардан бұл қызметке Қырғыз Республикасының өкілі Таалатбек Масадыковты үш жыл мерзімге тағайындау туралы шешім қабылдады. Отырыс соңында Ұжымдық қауіпсіздік кеңесінің декларациясы қабылданды. Бұдан бөлек Ұйымға мүше мемлекеттердің мүддесіне сай қауіпсіздік жүйесін дамытуға бағытталған бірқатар құжатқа қол қойылды.