Тәттімбеттің 210 жылдығы аталып өтті

ТҮРКСОЙ халықаралық ұйымының Анкарадағы штаб пәтерінде күйші Тәттімбет Қазанғапұлының 210 жылдығына арналған салтанатты шара өтті. Жиынға қатысқан ТҮРКСОЙ ұйымының Бас хатшысы Сұлтан Раев Тәттімбеттің музыкасы – Түркі дүниесінің ортақ мәдени мұрасы екендігін, себебі Тәттімбет шығармалары барша түркі әлемінің өнеріне қосылған үлкен үлес екенін атап өтті. Іс-шарада қазақтың танымал күйшілерінің бірі, профессор Жанғали Жүзбай мен «Қазақконцерт» солисі, жас өнерпаз Қайрат Айтбаев өнер көрсетті. Бағдарлама аясында дәстүрлі «шертпе күй» өнерін үзбей жалғастырып келе жатқан белгілі профессор Жанғали Жүзбай қазақ халық музыкасына және Түркі дүниесінің мәдениетіне қосқан үлесі үшін ТҮРКСОЙ медалімен марапатталды.