Р.Берденов ісі: апелляциялық сот үкімді өзгеріссіз қалдырды

Шымкент әкімінің бұрынғы орынбасары Руслан Берденовке жасалған шабуылға қатысты іске нүкте қойылды. Апелляциялық сот үкімді өзгеріссіз қалдырды. Бұған дейін айыпталушы Ернар Жиембай бас бостандығынан айыру жазасын шартты жазаға ауыстыруды сұраған. Ол кісі өлтіру ниеті болмағанын айтты. Ал жәбірленушінің адвокаттары, айыпталушының шабуылға мұқият дайындалғанын айтып, керісінше, істі қайта саралауды талап еткен еді. Алайда сот екі тараптың да өтінішін қанағаттандырмады. Енді Руслан Берденовтің қарамағында болған қызметкер тоғыз жылын түрмеде өткізеді. Үкім заңды күшіне енді.