Жас дін көшбасшыларының ІІ форумы нақты шешімдер алаңына айналды

Дүниежүзілік және дәстүрлі діндер лидерлерінің VIII съезі жалғасып жатыр. Бүгін Сенат төрағасы Мәулен Әшімбаевтің жетекшілігімен Жас дін көшбасшыларының ІІ форумы өтті. «Жастар бейбіт өмір сүруі үшін: болашақ жолындағы синергия» атты жиында жастардың шығармашылық әлеуеті, жалған ақпаратқа қарсы күрес, халықаралық қауіпсіздік пен тұрақтылықтағы жастардың рөлі сынды мәселелер қаралды. Бұл форум – тек пікір алмасу ғана емес, әр елдің өкілі тәжірибемен бөлісіп, нақты шешімдер ұсынатын алаңға айналды.

Евгений Зинковский, «Рим-Католик» шіркеуінің көмекші епископы:

Әлемге көз салсақ, қазір жастарда құндылық бөлек. Материалдық жағдайлар бірінші орынға шықты. Бірақ Қазақстанда жағдай басқаша дер едім. Бұл елде жастар әлі де рухани құндылықтарға мән береді. Сыйластық, ізеттілік, құрмет сынды қасиеттер басым. Соны байқадым. Жастар арасындағы мәселелер алаңдатқандықтан, жас дін көшбасшыларының жиынына қатыстым. Біз жіпке тізіп, көптеген проблемаларды талқыладық.