Газадағы соғыс құрбаны 65 мыңнан асты

Израиль жауынгерлері мен танкілері Газа қаласының орталығына еніп жатыр. Мақсат – Хамастың соңғы бекінісі саналатын шаһарды басып алып, ондағы 3 мыңдай содырды жою. Бұл әскери операция бірер күн бұрын басталды. Оның қарсаңында аспаннан эвакуация туралы үнпарақ жаудырылды. Бірақ 1 миллиондай палестиналықтың 350 мыңы ғана оңтүстікке қарай қашқан. Ал жүздеген мың тұрғын көшуден бас тартып отыр.

Газа секторында Хамас-Израиль шайқасы 2023 жылы қазанның 7-де еврей мемлекетінің оңтүстігінде 1200-ге жуық адам өлтіріліп, 251-і кепілге алынғаннан кейін басталғаны белгілі. Жергілікті денсаулық сақтау министрлігінің дерегінше, содан бері 65 мыңнан астам адам қаза тапты. Құрбандардың көбі әйелдер мен балалар.