Мыңдаған палестиналық Газа қаласынан қашуға мәжбүр

Газа қаласынан палестиналықтар қашып жатыр. Олардың жаппай бас сауғалауына Израиль армиясының бұл шаһарды оккупациялау операциясын бастауы себепші. Кейінгі екі күнде ЦАХАЛ күштері жиырма нысанға соққы берген. Одан балалар ауруханасы да зардап шегіп, науқастардың жартысы туыстарымен бірге эвакуацияланды. Жалпы алғанда, Израиль әскері «Хамастың» соңғы бекінісі Газада 3 мыңдай содырды жойып, олардың қолында екі жылдан бері кепілдікте отырған адамдарды босатуды көздеп отыр. Бірақ осы науқан үшін Израиль қазір үлкен халықаралық сынға ұшырап жатыр. Дүниежүзіндегі 20 шақты гуманитарлық ұйымның жетекшісі әлем елдерінің лидерлеріне үндеу жасап, оларды Газадағы жантүршігерлік жағдайға тезірек араласуға шақырды.