Ертең күрестен Әлем біріншілігі басталады

Ертең Загребте күрес түрлерінен әлем біріншілігі басталады. Жаһан жұрты назарын тігетін додада 30 жүлде жиынтығы сарапқа салынады. Әсіресе қазақ жанкүйері бұл біріншілікті тағатсыздана күтуде. Неге? 

Азат Қадырбек,тілші:

Шақпақты елдің астанасындағы аламан Загреб аренада өтеді. Олимпиадалық және олимпиадалық емес салмақ дәрежелерінің 1200 өкілі 9 күнге жалғасатын тартыста өзара мықтыны анықтайды. Еркін және грек-рим күресінде отандастарымыз толық құраммен бақ сынаса, әйелдер күресінде тек 65 келіде өнер көрсетпейміз. Дәл қазір жарыс аймағында соңғы дайындық жұмыстары жүргізілуде.

100-ге жуық елдің бозкілем шеберлері бақ сынайтын бәсеке шымылдығын еркін күрес шеберлері түреді. 13 қыркүйекте 61, 70, 86 және 125 келінің өкілдері жарыс жолына шықпақ. Қазақстан құрамасының намысын бұл күні Асылжан Есенгелді, Нұрқожа Қайпанов, Азамат Дәулетбеков және Әлішер Ерғали қорғайды. Бұған дейін Әлем чемпионатында олжа салған Нұрқожа мен Азаматтан жанкүйерлер бұл жолы да жүлде күтіп отыр.

Байрақты бәсекені  «Qazsport» арнасынан тікелей эфирде тамашалаңыздар.