Жаңалықтарды Telegram арнамыздан оқыңыз!Сарыағаштықтар жылыжайдың жұмысын жетік меңгерген. Аудан халқы түгел осы егіншілікті кәсіп етеді. Жыл он екі ай жылыжайда жұмыс істеп, күнделікті нәпақасын табады. Солардың бірі - Раушан Әсілбекова. Құлпынай өсіретін шаруашылықта қызымен бірге еңбек етіп, білгенін жаңадан келген жастарға үйретіп жүр. Айнұр Әбілқасымқызы тарқатады.
Сарыағаш ауданының тұрғыны Раушан Әсілбекова таң атқаннан қара кешке дейін жылыжайда жұмыс істейді. Төрт баланың анасы, 58 жастағы әйел құлпынайдың арасындағы арам шөпті жұлып, тазартады. Керек кезде кетпен шауып, құлпынай тереді.
Раушан Әсілбекова, жұмысшы:
Кетпен шапсаң да қиын. Мына жердегі жұмыс оңай емес. Оны істеген адам біледі да, еңбек етсең қалай қиын болатынын. Кешке қарай беліңді бүге алмай қиналған кездерің де болады. Шыдамдылық керек, төзімділік керек.
Раушан Әсілбекованың қызы Дана да жылыжайда еңбек етеді. Осында тұрақты жұмысқа тұрғанына бір жылдан асқан. Ширақ қимылдап, өнімді жұмыс істесең жақсы табыс табуға болады дейді ол.
Дана Мамытшаева, жұмысшы:
Қазір біз құлпынайдың астындағы қураған сабағын, қураған түйіндерін жұлып жатырмыз. Ертең бұл құлпынай өсіп, қалыңдап кетпеуі керек. Арық, жүйектердің ішіндегі шөптерді тазаладық. Осы тік тұрып істеген еңбегімізді ақтайды.
Шаруашылықта құлпынай бес гектар жылыжай мен сегіз гектар ашық алқапта өсіріледі. Барлық жұмысшы Тегісшіл ауылдық округіндегі елдімекендерден тартылған. Басым көпшілігі қыз-келіншектер.
Біләл Қасымбеков, агроном:
Қазір көп емес, 10-15 адам жұмыс істейді. Ал маусым уақытында 100-120-ға шейін шығады. Барлығын нақты береміз енді. Күндігіне 6-10 мыңға дейін кетеді. Егер көлем беретін болсақ, істегеніне қарай кетеді. Ең кем алған адамдар 5-6 мың алып жатыр.
Осылайша ауылда адал еңбегімен отбасын асырап жүргендердің қатары көбейіп келеді. Ал ауданда жылыжай шаруашылығы қарқынды дамып, елімізде көш бастап тұр. Оның өніміне сұраныс та жоғары.
Айнұр Әбілқасымқызы
