Жаңалықтарды Telegram арнамыздан оқыңыз!Салық заңнамасына өзгерістер Парламентке кіргізілгені мәлім. Жалпы отырысқа дейінгі талқылаудың бірінде Алмас Чукин есімді экономист
«...Біз Ұлттық қордан түсетін «ауруды басатын дәріні» қабылдап жүрміз. Емделудің орнына тек ауруды сездірмеудің амалын ғана істеп отырмыз. Болашақ ұрпақтың ақшасын ұрлап жатырмыз» деген.
Бюджеттің шығысын жабатын бөлігі де, дамуды қамтамасыз ететін бөлігі де бейнелеп айтсақ, тартылған теңіз болып тұр. Тартылған теңіздің қандай болатынын біз жақсы білеміз.
Сонымен қосылған құн салығын өсіру, айналымды 15 млн теңгеге дейін түсіру жағдайдың қандай екенін көрсетсе керек. Дегенмен жағдайды бағамдай алу сұрақты азайтпайды. Мысалы, бірінші кезекте ірі кәсіп иелерін «тақтаның алдына шығару» керегін жұмадағы жиынында Үкіметтің өзі мойындады.
Қаржы министрі М.Тәкиев, олардың салықтан жалтарып, неше түрлі қулыққа барып отырғандарын айтты.
Компаниялар шығындарын өсіріп көрсетіп, салықтарын оңтайландырады. Мысалы, тауар сатып алады да, оны өзіндік құнымен салықтан босатылған фирмасына сатады. Өзі шығынға батып отырған болып көрінеді, екіншісі ҚҚС төлемейді.
Бизнесті бірнеше заңды тұлғаға бөледі. Мейрамханадағы бар – бөлек, асхана – бөлек, караоке – бөлек компания. Қонақүйдің әр қабаты әр түрлі жеке кәсіпкерлік нысаны. Айналымы 78 млн теңгеге жетсе, жабады да, басқасын ашады.
Салықты азайту үшін қызметкерлерін де жеке кәсіпкер қылып рәсімдейді. Қызмет көрсететін серіктес етіп көрсетеді де салықтан, әлеуметтік міндеттемелерден «құтылады».
Оның сөзін іліп әкеткен Үкімет басшысы нақ BI Group пен BAZIS-A құрылыс компанияларын атады. «Бюджетке миллиардтаған айналымдарына сәйкес келмейтін салық төлейді. Мәселен, ірі құрылыс компаниялары BI Group пен BAZIS-A және басқалар», - деді О.Бектенов.
Сөйтіп ірі кәсіпкерлерге екі аптаның ішінде нақтыланған салық декларациясын өткізіп, төлеуі керек салықты төлеуді тапсырды. Әйтпесе салық және құқық қорғау құралдары қолданылады деп қосты.
Ол компаниялар бірден ақталып, жасырғанымыз жоқ деген пікір айтты. Бірақ тағы бір рет есептейді-ау. Қаржы министрлігі BAZIS-A компаниясына салық салынатын кірісті 4,6 млрд теңгеге, BI Group-қа 11,9 млрд теңгеге аз қылып көрсеткені туралы хабарлама жібергенін хабарлап үлгерді.
